Иргэдийн аюулгүй орчинд амьдрах эрхийг нэгд тавина

Нийслэлийн Засаг даргын 2026 оны хоёрдугаар сарын 2-ны өдрийн А/164 дүгээр захирамжаар шилжиж ирсэн СТ-1, СТ-2, СТ-3 дугаар барилгуудын дахин төлөвлөлтийн төсөл хэрэгжүүлэгч компанийн сонгон шалгаруулалтыг 2026 оны гуравдугаар сарын 9-ний өдөр албан ёсоор зарласан билээ.

Сонгон шалгаруулалтын үйл явц ил тод, нээлттэй явагдаж, төслийг хэрэгжүүлэх чадварлаг компанийг сонгоход оршин суугчдын оролцоог хангах зорилгоор байр тус бүрээс хоёр иргэнийг төлөөлөл болгон томилж, үнэлгээний үйл ажиллагаанд идэвх санаачилгатай хамтран ажиллахыг уриаллаа.

"Улаанбаатар орон сууцжуулалт" ХХК-ийн Захиргаа, санхүүгийн газрын дарга Б.Пүрэвсүрэн: СТ-1, СТ-2, СТ-3 дугаар байруудыг СТ-4 байршлын шинэ орон сууцтай адил бүрэн цутгамал барилга бариулна. Дахин төлөвлөлт нь барилгын бизнес бус, иргэдийн эрхийг хангаж эрүүл, аюулгүй орчинд амьдруулахад чиглэсэн ажил юм.