Дубай бол 3D хэвлэмэл барилгын технологийг бодлого, инженерчлэл, барилгын норм дүрэм, зах зээлийн механизмын түвшинд нэвтрүүлсэн дэлхийн цөөн хотуудын нэг бөгөөд энэхүү технологийг түр хугацааны барилга байгууламж төдийгүй тогтмол ашиглалтад ордог байгууллага, оффис, төрийн үйлчилгээний байгууламжид хүртэл хэрэглэж эхэлсэн нь олон улсын анхаарлыг татсан. Хотын удирдлага 2016 онд “Dubai 3D Printing Strategy”-г зарлахдаа 2030 он гэхэд шинээр баригдах бүх барилгын 25 хувийг 3D хэвлэмэл технологиор гүйцэтгэнэ гэж мэдэгдсэн бөгөөд энэ зорилтыг бодит ажил болгон хэрэгжүүлэхийн тулд барилгын дүрэм, материалын стандартыг хүртэл шинээр боловсруулсан.
Дубайн 3D хэвлэсэн барилгын шинэчлэлийн эхлэл 2016 онд ашиглалтад орсон дэлхийн анхны бүрэн хэмжээний 3D хэвлэмэл оффис — “Office of the Future” барилгаас эхэлсэн. Энэхүү барилгыг том оврын 3D бетон принтерээр ердөө 17 хоногийн дотор хэвлэж, угсралтын ажлыг хоёрхон хоногт дуусгасан нь барилгын технологийн түүхэнд томоохон эргэлт болсон. Уламжлалт аргаар ижил барилга барихад олон арван ажилчид, хэдэн сарын хугацаа шаардлагатай байдаг бол 3D хэвлэлт нь ажиллах хүчний хэрэгцээг 50 хүртэл хувиар бууруулсан тухайг Dubai Future Foundation-ийн албан мэдээнд тэмдэглэсэн байдаг.
Үүнээс гадна 3D хэвлэлийн материалын онцлог нь зөвхөн шаардлагатай хэсэгт бетон шахдаг тул барилгын хог хаягдал 60 хувь хүртэл буурч, угсралтын үеийн материалын гарз эрс багасдаг. Энэ нь Дубайн хотын энэхүү технологийг сонгосон гол шалтгаануудын нэг бөгөөд барилгын салбарын нүүрстөрөгчийн ул мөрийг бууруулах оролдлоготой уялдаж байна.
Технологи зөвхөн туршилтын түвшинд зогсох бус бодит том хэмжээний дэд бүтэц болж чадсаны тод жишээ нь 2021 онд Дубайн Захиргаа барьсан “дэлхийн хамгийн том 3D хэвлэмэл барилга” юм. Энэхүү байгууламж нь бүрэн бетон хэвлэлтээр баригдсан анхны томоохон хэмжээний бүтцийг төлөөлж, хотын дарга Хамдан бин Мохаммед “ирээдүйн барилгын үндэс суурийг тавилаа” хэмээн тодорхойлсон байдаг. Энэ барилга нь зөвхөн технологийн дэвшил бус, нийгмийн үйлчилгээний зориулалттай бодит объект бөгөөд 3D хэвлэлт илүү найдвартай, зохион байгуулалт сайтай, хүний нөөц багатайгаар өндөр бат бөх барилга барьж болохыг баталжээ.
2021 онд хүчин төгөлдөр болсон “Decree No. (24) of 2021 - 3D хэвлэлтийг зохицуулах тухай хууль” нь 3D хэвлэмэл барилгын техникийн шаардлагыг албан ёсоор зохицуулж, барилгын материал, бетон хольц, хэвлэлийн нарийвчлал, бүтэц, аюулгүй байдлын үзүүлэлтүүдийг тодорхой заасан анхны эрх зүйн баримт юм. Үр дүнд нь 3D хэвлэлтийн технологи зөвхөн туршилт бус, стандартчилсан барилгын систем болж, хувийн хэвшил болон хөгжүүлэгчдэд нээлттэй болсон.
2024 онд Dubai Municipality шинэчилсэн “3D Printed Construction Guideline - 1st Edition” баримтыг танилцуулж, 3D барилгын материалын магадлал, бүтцийн тооцоолол, инсоляци, дулаан дамжуулалт, аюулгүй байдлын туршилтын аргачлалыг нарийвчлан тогтоосон нь энэхүү технологийг илүү өргөн хүрээнд ашиглах үндэс болсон. Барилгын инженерүүдийн хэлж буйгаар, 3D хэвлэлт нь одоо зөвхөн оффис, үзүүлэн биш, орон сууц, нийтийн үйлчилгээ, сургууль, эмнэлэг зэрэгт ашиглах боломжтой болсон бөгөөд Дубай хот энэ шилжилтийг хамгийн хурдтай хийж буй улс орнуудын нэг юм.
Өнөөгийн байдлаар 3D хэвлэмэл барилгууд нь хуучин бага талбайтай байгууламжуудыг буулгалгүйгээр дээр нь эсвэл хажууд нь шинэ байгууламж барих боломжийг олгож, хотын сэргэлтийн хурдыг хэчнээн их нэмэгдүүлж болохыг харуулж байна. Сүүлийн жилүүдэд Дубайн иргэдийн орон сууцны хороолол, жижиг төрийн оффисууд, бүр цахилгаан дэд станцын хамгаалалтын байгууламжийг хүртэл 3D хэвлэх аргаар богино хугацаанд барьж, хотын үйлчилгээний доголдлыг багасгаж байна.
Техникийн хувьд бетон хэвлэх том оврын принтерүүд нь нэг цагт олон метр хана үүсгэх чадвартай бөгөөд хүний гараар хийх шаардлагатай ажил маш цөөрч, бүтээн байгуулалтын талбайн аюулгүй байдал мэдэгдэхүйц сайжирдаг. Энгийн барилгад олон төрөл мэргэжлийн ажилтнууд зэрэгцэн ажилладаг бол 3D хэвлэлт нь оператор, техникийн инженер, угсралтын баг гэсэн цөөн хүний командаар хэрэгжих боломжтой тул хөдөлмөрийн бүтээмж эрс нэмэгддэг.
Энэ технологийн хамгийн хүчтэй давуу тал нь уян хатан байдал юм. Архитекторууд уламжлалт хязгаарлагдмал хэлбэрээс ангид, чөлөөт муруй, дугуй, органик хэлбэрээр барилга барих боломж бүрдсэн.
Өнөөдөр Дубайн хотын инженерүүдийн тооцоолсноор 3D хэвлэлт нь дунд оврын барилгын өртгийг 30 - 50 хувь, барих хугацааг 50 хүртэл хувиар бууруулж байгаа бөгөөд түр байгууламж болон хуучин барилгын хурдан шинэчлэлд хамгийн тохиромжтой технологи болжээ. Хотын эдийн засгийн загварчлалаар бол 2030 он гэхэд барилгын салбарын нийт бүтээн байгуулалтын нэг чухал хэсэг нь 3D хэвлэлт болно гэж үзэж байгаа бөгөөд энэ нь Дубайг ирээдүйн архитектур, хотын технологийн төв болох зорилгод улам ойртуулж байна.
Эх сурвалж:
https://dlp.dubai.gov.ae/Legis...
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
MN
EN
Сэтгэгдэл бичигдээгүй байна