СОНГИНОХАЙРХАН ДҮҮРГИЙН 1, 2, 34 ДҮГЭЭР ХОРООНД ХЭРЭГЖИХ ГЭР ХОРООЛЛЫН ДАХИН ТӨЛӨВЛӨЛТИЙН СУДАЛГААНЫ НЭГДСЭН ТАЙЛАНГ ТАНИЛЦУУЛЛАА

Сонгинохайрхан дүүргийн 1, 2, 34 дүгээр хороонд хэрэгжих гэр хорооллын дахин төлөвлөлтийн төслийн хүрээнд Гэр хорооллын дахин төлөвлөлтийн хэлтсийн хийсэн судалгааны нэгдсэн дүнг “Эвтү Гэрэгэ консалтинг” ХХК нэгтгэж тайлагналаа.

Судалгаагаар хүн ам зүй, газрын эрх, сууцны төрөл, төслийн дэмжлэг, мэдээллийн хүртээмж, иргэдийн оролцоо, сууцны сэтгэл ханамж, орчны дэд бүтцийн үнэлгээ, нөхөн олговрын сонголт, төслийн хэрэгжилтийн эрсдэл зэрэг үндсэн чиглэлүүдийг хамруулсан байна.

Судалгаанд нийт 718 өрх хамрагдсан бөгөөд оролцогчдын 54.3 хувь нь эрэгтэй, 45.7 хувь нь эмэгтэй байв. Насны бүтцийн хувьд 35-44 насныхан хамгийн өндөр буюу 28.2 хувийг эзэлж, дахин төлөвлөлтийн нөлөөлөлд хамрагдаж буй иргэдийн 74.6 хувь нь 35-64 насныхан байна.

Нөхөн олговрын хэлбэрийн хувьд судалгаанд хамрагдсан өрхийн 87.1 хувь нь бэлэн мөнгөөр худалдах, 15.9 хувь нь орон сууцаар солих саналыг илүүд үзсэн байна.

Толгойт дэд төвийн хөгжлийн чиглэлийн талаар иргэдийн 68.9 хувь буюу 496 өрх орон сууцны хотхон, цогцолбор хэлбэрийн хөгжлийг дэмжсэн бол 37.6 хувь буюу 271 өрх амины болон орон сууцыг хослуулсан загварыг дэмжжээ. Харин түрээслэх болон өмчлөх хосолсон загварыг 13.5 хувь нь дэмжжээ.

Судалгааны үр дүнгээс харахад төслийн зураг төсөл, төлөвлөлтийг иж бүрэн боловсруулж, баталгаажуулсны үндсэн дээр иргэдэд төслийн талаарх мэдээллийг ойлгомжтой, хүртээмжтэй хүргэх хэрэгцээ өндөр байна.

Мөн дахин төлөвлөлтийн хүрээнд ногоон байгууламж, тохижилт, зорилтот бүлэгт чиглэсэн орчин, нийгэм, соёлын хэрэгцээг харгалзан үзсэн төлөвлөлтийг тусгах шаардлагатай байна.