Сүхбаатар дүүргийн 6-р хорооны 22 дугаар байрны оршин суугчдын төлөөлөлтэй товлосон ёсоор өнөөдөр уулзалт хийлээ. Өнгөрсөн долоо хоногийн уулзалтаар “Улаанбаатар орон сууцжуулалт” ХХК-ийн Гүйцэтгэх захирал З.Төмөртөмөө төсөл хэрэгжүүлэгч компанийг иргэдийн хүсэлт саналыг харгалзан үзэж, метр квадратын үнийн дүнг уян хатан байдлаар зохицуулах тал дээр шийдвэр гаргаж өгөхийг хүссэн бол оршин суугчдыг мөн саналаа нэгтгэж, нэг талдаа гарахыг уриалсан юм.
“Хан хөгшин стэйт” ХХК-ийн гүйцэтгэх захирал С.Дэмчиг:
-Манай компани анх удаа дахин төлөвлөлтийн ажил хариуцаж байгаа юм биш. Олон сайн төсөл дээр ажиллаж байсан туршлагатай компани. Бид Итали, Германы чанартай барилгын материалыг сонгож барилга, бүтээн байгуулалтын төслөө хэрэгжүүлдэг. Энэ бүх давуу талыг маань харгалзаж үзсэний эцэст төсөлд хэрэгжүүлэгчээр шалгаруулсан байх.
Танай байр хэдийгээр жижиг талбай хэмжээтэй, олон айлтай ч бид жишиг болохуйц сайн төсөл хийхээр зорьж байгаа. Өөрөөр хэлбэл, оршин суугчид та бүхнийг чанартай орон сууцанд амьдруулахыг зорьж байна.
Тиймээс дааж давашгүй зүйл шаардахгүй байхыг хүсье.
Оршин суугчдын төлөөлөл: 3 жил орон гэргүй болсон иргэдийн амьдрах орчныг сайжруулахын төлөө явж байгаа “Улаанбаатар орон сууцжуулалт” ХХК, төсөл хэрэгжүүлэгч компани юун түрүүнд талархаж байна.
Гэвч метр квадратын үнийг тодорхой болгож, төлөлт дээр уян хатан нөхцлийг хангаж өгөөч.
Ямартаа ч дахин төлөвлөлтийн ажилд зөвшилцөл, ойлголцол л чухал гэдэг дээр санал нэгдэж, харилцан тохиролцох тал дээр аль аль талдаа анхаарч ажиллана гэсэн юм.
Одоогоор тус төслийн эргийн хамгаалалт, орц гарцыг шийдэх ажил хийгдэж байна. Оршин суугчдын хоёр болон гурван талт гэрээ 71 хувьтай явагдаж байна.
Боломж байвал ирэх оны наймдугаар сард төслийг дуусгах төлөвлөгөөтэйгээр ажиллаж байна гэж тус компанийн захирал онцоллоо.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
MN
EN
Сэтгэгдэл бичигдээгүй байна